ضل الجرح ينزف والدموع تسيل
يا وركة عنب تحركهه جمره
بغداد تمطر حزن والشهكه حالوب
والملح غطه الجروح بليله غبره
صاحت (هلي) والوسيعة تضيك
ماخلت صده ولا نشفت عبره
صار الغدر ينحر بلايه اسباب
الشيعي كتله هنا والسني فجره
صارت ملاحم صدك موتمثيل
والدم شراب الناس موخمره
طك اللغم طاحو عشره عشرين
واللغم ما مكصود مجبور اعذره
شجاب البشر لهناك خيولون
مادرو مزروع اللغم يم شجره
مادرو بدلنه الورود بناسفه وتابوت
ورمانه ورصاصة غيض متحضره.
كل يوم المناحه بصوت تنكال
وجروحي ملت مابعد تبره
غم هذا الوكت خلانه متهجرين
بصلاح الدين وبكركوك والشطره
بسامره وبلنجف والكوت والانبار
وديالى وكربله واربيل والبصره
وبعد لو عددت يخلص حبر الاقلام
وما خلصت الاهات ولا خفت الحسره
جاير علينه الزمن خلانه مذبوحين
حسب العشاير كلمن رتبو كبره.
شالو سيوف الموت وشرحو اطفال
والوطن ياحيف كطعو صدره
وسجنو عروس الكون يحبيبه بغداد
لاشمس التمرهه ولاساعه كمره
وهلهلو ياحسرتي بلنصر فرحانين
ونركص ركص مذبوح من نحره
لاياوكت حيل اضلمتنه وياك
ماضل صبر بلوطن وتكلي صبره
غابت شمسنه ويمكن الغيبه تطول
وهجم ليل بسواده ونار كبره
فاركنه بغداد وضلت دموع العين
محبوسه بخناجر كفر منتصره
فاااركنه بغداد وضلينه بس نشتاك
للخلان والكعدات ومبادل العشره
نضحك من بعد صفنات مهضومين
ويطفر دمع من تخنك العبره
ونصفك ندم لو نسمع اغاني فراك
ونرجع نكابر ونزرف الجره
كافي ملامه وحزن نتلاكه بغداد
واحضنج واذرف عيون منتضره
ياجنة عدن صدكينه معذورين
غصبونه انتفارك جبرونه عالهجره
ضحكي اعله الزمن والجرح موقوت
باجر تصير الاه سالفه وذكره
باجر تصير الاه سالفه وذكره
_________________________
مع حبي واخلاصي لك يا عراق
الأحد سبتمبر 23, 2007 3:00 pm